薯仔鱼的畅想天地

    呢個星期嘅班系主班，夜班呢兩晚要值班，估唔到我第一次值班就遇到大單野——飛臺灣嘅直航首航，仲要居然系半夜開始登機，凌晨起飛，所以我地好好彩地要通宵留喺機場了。
    果晚狀態唔多好，仲擔心左好耐萬一有記者影相點算，好在原來根本唔俾影安檢口，搞到我又有d失望添。不過d報道靜系關心d旅客幾咁興奮，d機組幾咁認真對待，邊有人得閑關心仲有我地都要捱更抵夜陪佢地一齊癲啊。。。所以果晚新聞次次一播到呢條新聞我地就開始聲討南航同呢個臺灣包機，尤其是果個出盡風頭嘅機長。。。

    撇開捱眼訓好痛苦來講，通宵值班都幾好玩嘅，起碼休息室有電視睇（原來半夜而家重播緊《沖上云霄》喔！真系有親切感啊～仲有唔知系咪湖南衛視凌晨嘅時候播果個咩奧運沖沖沖之類嘅游戲節目都幾盞鬼～），成個班嘅人可以一齊睇電視食宵夜聯絡下感情。 終于明白點解做安檢唔會瘦了，因為雖然企得多，但大家到半夜經常會食宵夜，乜都補翻曬啦！

    出來做野先知道，工作同以前喺學校真系好唔同啊，以前做k記就發覺做餐飲最慘就系吃飯時間自己好可能要捱肚餓仲要強顏歡笑服務顧客，而家呢份呢，就要捱眼訓強顏歡笑——果晚我地系從點幾鐘喺休息室趴喺臺度訓到三點幾，訓到懵懵松松嘅時候，監生俾人叫翻醒（我仲慘到醒嘅時候左手左腳都痹曬。。。），走去洗面，再出去扮曬精神咁嘎。。。等到早上五點幾上早班嘅人來接班我地先走得啊陰功！真系求神拜佛下次值班千其千其唔好又遇到臺灣周末包機啊！
 
    非常好彩地，第二晚值班，本來以為可以點幾鐘走人，點不知又話飛巴黎嘅航班延誤，唔知幾點先飛得，等到佢2點旅客登機了我地先撇得，我坐2點半嘅職工車走，翻到北門以為可以順風順水坐夜22轉夜40快速返歸啦，點不知，個夜22一等，俾我等到4點幾，仲要黑仔到落早左一個站，搞到打的又打遠左了。結果，落2點，我搞到幾乎5點先翻到屋企。不過最不幸嘅都唔系我，最不幸嘅系果個剛好同我一齊喺北門落車，于是俾我拉住陪我等車嘅無辜嘅班長。不過講開又講，如果唔系佢肯陪我等車，我一早就打的翻左屋企了，點會咁大膽半夜喺機場路路邊自己等車等個幾鐘，所以——都系佢嘅錯。。。

     等車吹左個幾鐘水嘅過程中，又了解左一d出來社會做野真系好多黑暗面，唔通出來做野真系唔可以交知心朋友？真系講得越多對自己越不利？真系同行如敵國？真系咁多背后放暗箭嘅人？。。。我又俾人話我幼稚～～我寧愿幼稚d都唔想咁快變得世故圓滑了。。。